Umfjöllun um ÍBB í Breiðholtblaðinu sem borið var í hús í dag

Breiðholtsblaðið kom út í dag og var borið út í öll hús í Breiðholti.

Íbúasamtökin Betra Breiðholt fá góða úttekt í blaðinu undir fyrirsögninni
Skiptir máli að fá sem flesta með.

Í greininni eru reifuð helstu mál ÍBB svo sem útivistarsvæði og umferðarmál, bílatæðaskortur, baráttan fyrir gatnamótum Bústaðarvegar og Reykjanesbrautar og hversu mikilvægt það er að fá sem flesta Breiðhyltinga til að taka þátt í vinnu með samtökunum svo þoka megi málum hverfisins sem best áfram.
Nú fer að líða að aðalfundi og þá væri gaman að sjá íbúa Breiðholts fjölmenna.

Í Breiðholtsblaðinu eru einnig gerð gríðargóð skil á Breiðholtshátíðinni sem er nýafstaðin. Skemmtilegar myndir eru af gestum hátíðarinnar, forsetahjónunum og starfsfólki Árskóga sem dæmi en þar var Breiðholtshátíðin sett.

Vissir þú, kæri Breiðhyltingur, þetta?

-Elsta byggð í borgarsamfélaginu Breiðholti er farin að nálgast fertugt.

-Breiðholtshverfið er fjölmennasta hverfi borgarinnar með rúmlega tuttugu

þúsund íbúa.

Áríðandi tilkynning:

Aðalfundur Íbúasamtakana Betra Breiðholt verður haldinn í Gerðubergi fimmtudaginn 22 nóvember 2007.  Íbúar eru hvattir til að fjölmenna.
Fundurinn verður auglýstur betur þegar nær dregur. 

Slökkvistöðin Elliðaárdalsmegin við Stekkjarbakka

Deiliskipulagstillaga um nýja slökkvistöð við Stekkjarbakka er komin í auglýsingu sbr. frétt í Mbl. í dag, 28. september 2008.

Áhugasamir hafa frest fram til loka októbermánaðar til að senda inn athugsemdir sínar.

Tillagan gerir ráð fyrir að ný lóð verði afmörkuð fyrir hverfisstöð slökkviliðsins og breytt lega verði á vegi fyrir umsjónarmann við Skálará. Bílastæði og önnur þjónusta mun færast norður fyrir byggingarreit slökkvistöðvarinnar.

Nokkrar óánægju hefur gætt með staðarval stöðvarinnar og finnst sumum að gengið verði um og of á útivistarsvæði í Elliðaárdalnum.

Slökkviliðsstjóri segir hins vegar að staðarvalið sé vel ígrundað enda liggi viðamikil greining á útkallstíma SHS  á öllu höfuðborgarsvæðinu þar að baki.  Staðsetningin sé valin með tilliti til hagsmuna almennings. Rísi stöðin þarna sé hún vel staðsett við stofnbrautarkerfið.

Breiðholtsdagar í fullum blóma

Breiðholtshátíðin er nú í fullum blóma og hafa dagskrárliðir gengið vel að því sem best er vitað.
Setningin í Árskógum var stórkostleg. Forseti Íslands Hr. Ólafur Ragnar Grímsson opnaði hátíðina og á sama tíma málverkasýningu heyrnalausra listamanna. Frú Dorrit var glæsileg að vanda og gaf sér góðan tíma til að heilsa upp á alla nærstadda.

Í gær var skrifstofa Alþjóðahúss í Breiðholti opnuð með viðhöfn og glæsilegri móttöku í Gerðubergi.

Áfram verður haldið í dag, miðvikudag en það sem ber hvað hæst er kökubasar og kynning á Kvenfélaginu Fjallkonunum og síðan eftir hádegi kynning á Námsflokkunum.
Bókmenntaganga verður frá Borgarbókasafninu kl. 17:00 og þaðan förum við beint í kaffi í Miðbergið. Nánara um dagskrárliði er að finna í Breiðholtsblaðinu sem nú hefur verið borið í hús.
Góða skemmtun.

Breiðhyltingar bregða á leik 15-20 september

Breiðholtshátíðin sem er menningar- og fjölskylduhátíð Breiðholts hefst mánudaginn 15. september með metnaðarfullri dagskrá  víðs vegar í Breiðholtinu. Hr. Ólafur Ragnar Grímsson, forseti Íslands heiðrar Breiðhyltinga með nærveru sinni fyrsta dag hátíðarinnar.
Forsetinn setur hátíðina með formlegum hætti á Hjúkrunarheimilinu Skógarbæ, Félagsmiðstöðinni Árskógum 4 kl. 14:00. Við setninguna verður opnuð málverkasýning heyrnarlausra myndlistarmanna. Sögurútan fer um hverfið kl. 17:00.

Hátíðin nær hápunkti sínum á hátíðarsamkomu sem haldin verður í Íþróttahúsinu Austurbergi á sjálfan Breiðholtsdaginn 20. september þar sem Hanna Birna Kristjánsdóttir, borgarstjóri mun ávarpa samkomuna og afhenda heiðursviðurkenningarskjöl.

Breiðholtið hefur á að skipa gríðarlega margbrotnu mannlífi. Margbreytileikinn sést m.a. á því hversu margar fjölskyldur af ólíkum uppruna búa í Breiðholti.  Kjarni hátíðarinnar er að íbúar hverfisins fái tækifæri til að kynnast nágrönnum sínum og að fyrirtæki, stofnanir og félagasamtök í Breiðholti eigi þess kost að kynna íbúum starfssemi sína. Boðið verður upp á fjölbreytta viðburði fyrir öll aldurskeið. Lögð er áhersla á að sem flestir taki þátt og að allir geti fundið eitthvað við sitt hæfi.

Breiðhyltingar bjóða Alþjóðahús velkomið í hverfið sem opnar með viðhöfn þriðjudaginn 16. september kl. 17. Með tilkomu Alþjóðahúss í Breiðholtið skapast tækifæri til að auka enn frekar fjölmenningarleg samskipti í Breiðholti. Fyrr um daginn verður opnuð sýning á myndum ljósmyndasamkeppni sem haldin var í Breiðholti í sumar. Myndefnið var mannlíf og umhverfi í Breiðholti.

Leikskólabörn munu heimsækja Árbæjarsafn og eldri borgarar í Breiðholti fara í vinabæjarheimsókn til eldri borgara í Reykjanesbæ. Í göngugötunni í Mjódd verður haldin kynning á Námsflokkunum og einnig verður kökubasar og kynning á Kvenfélaginu Fjallkonunum í Hólagarði.

Í Breiðholti er fjölskyldan í fyrirrúmi. Málþing um málefni fjölskyldunnar verður haldið í Menningarmiðstöðinni Gerðubergi á fimmtudeginum eftir hádegi. Fulltrúar frá öllum helstu stofnunum sem koma að málefnum fjölskyldunnar munu halda fyrirlestra.

Eldri borgarar og grunnskólabörn eru með ýmis dans,- og söngatriði á takteinum að ónefndu pottakaffi í Breiðholtslaug alla morgna vikunnar. Foreldrar í Breiðholti munu treysta böndin á foreldramorgni í Breiðholtskirkju á föstudeginum og ekki má gleyma að minna á prjónakaffið með góðum gesti hjá Félagsstarfi Gerðubergs einnig á föstudeginum.   

Skipulagðar göngur eru fyrirhugaðar; Seljaganga með Guðrúnu Jónsdóttur, arkitekt og bókmenntaganga Borgarbókasafnsins. Kaffihúsið í Miðbergi býður göngugörpum í kaffi að lokinni göngu.

Kórar, söng,- og danshópar láta til sín taka í hátíðarvikunni. Vinabandið lætur sig ekki vanta og mun m.a. spila og syngja í Fríðuhúsi.

Á hátíðarsamkomunni munu unglingar úr Breiðholtsskóla sýna atriði úr Grease og ÍR danshópurinn taka sporið.Fjölmargar samveru,- og kyrrðarstundir sem og guðþjónustur og fyrirbænastundir verða haldnar í kirkjum Breiðholts þessa viku. Samkomuhald verður t.d. í Seljaskóla í umsjón barnastarfs Miðbergs. Messa verður í Maríukirkjunni við Raufarsel alla virka daga og ensk messa verður haldin í Maríukirkjunni á laugardeginum.

Íþróttafélag Reykjavíkur (ÍR) mun ekki láta sitt eftir liggja. Á laugardeginum munu deildir ÍR kynna starfsemi sína. Hoppukastali verður á staðnum, boðið verður til grillveislu og unglingaráð knattspyrnudeildarinnar blæs til uppskerufagnaðar svo fátt eitt sé nefnt.

Hér er einungis birt brot af þeirri viðamiklu dagskrá sem sett hefur verið saman í tilefni Breiðholtsdaga 2008. Breiðhyltingar eru hvattir til að fjölmenna á sem flesta viðburði og samverustundir sem haldnar eru víðs vegar í Breiðholti þessa viku.  Samhugur og samvera íbúanna er merki um hversu stoltir Breiðhyltingar eru af hverfinu sínu og hversu umhugað þeim er að gæða í það enn fjölbreyttara lífi og hlúa að ímynd þess og íbúum.

Bregðum á leik í Breiðholti vikuna 15-20 september 2008.

 

 

Upplýsingar berast ÍBB frá Ráðhúsinu vegna ábendinga í tengslum við 1, 2 og Reykjavík

Íbúasamtökunum Betra Breiðholt hafa borist svör frá Verkefnastjóra á skrifstofu borgarstjóra í tengslum við ábendingar sem ÍBB sendi inn á vefinn 1, 2 og Reykjavík.

Ábending er varðar Mjóddina.

Heil og sæl meðlimir í Íbúasamtökum Betra Breiðholts. Takk fyrir ábendinguna í tengslum við verkefnið 1, 2 og Reykjavík. Heildarskipulag fyrir Mjóddina mun liggja fyrir í haust. Verkefnið er í fullum gangi og fyrirhugað að hefja framkvæmdir í haust, þ.e. ef fyrirsjáanlegt er að hægt verði að ljúka þeim fyrir byrjun nóvember. Að öðrum kosti verður þeim frestað til vors 2009. Náið samráð er við félag kaupmanna í Mjódd um verkefnið.

Ábending er varðar undirgöng að ÍR svæðinu.

Fyrir liggur tillaga að deiliskipulagi fyrir ÍR svæði. Á því er að tillögu borgarstjóra gert ráð fyrir undirgöngum undir Skógarsel. Unnið er að frekari undirbúningi og hönnun. Stefnt er að því að framkvæmdir hefjist árið 2010. Því má bæta við að borgarstjóri hefur óskað eftir tillögum frá umhverfis- og samgöngusviði um fjölgun 30 km svæða og mislægra göngutengsla í borginni.

Ábending er varðar múrinn hjá Iðufelli.

Múrinn hjá Iðufelli að Fannafelli er ekki í eigu Reykjavíkurborgar. Borgaryfirvöldum er því ekki heimilt að rífa hann niður.

Fyrir hönd Reykjavíkurborgar, Svanlaug Jóhannsdóttir Verkefnastjóri á skrifstofu borgarstjóra.

 

1, 2 og Reykjavík kom í pósti í morgun. Þar má sjá lista yfir fyrirhugaðar framkvæmdir

Meðal þess sem er á dagskrá að bæta í Breiðholti er:

1. Fegrun, hringtorgs til móts við Eddufell og Fellaskóla, 2008

2. Trjálundur, Stelkshólar, 2008

3. Leiksvæði endurgert við Tungusel, 2009-2010

4. Dvalarsvæði endurgert, Austurberg, 2008 

5. Sparkvöllur - gervigras, Hólabrekkuskóli, 2008

6. Sparkvöllur- Breiðholtsskóli, 2008 

7. Gróðursetning og leiktæki Jaðarsel, 2008

8. UNDIRGÖNG, SKÓGARSEL, 2009-2010

9. Dvalarsvæði endurgert, Seljatjörn, 2008

10. Leiksvæði endurgert, Seljabraut, 2009-2010

11. Framkvæmdir á skólalóð, Hólabrekkuskóli, 2008-2009

12. ENDURSKIPULAGNING MJÓDD, 2008-2009 

 

 Þetta er góð byrjun á að betrumbæta Breiðholtið en margar ábendingar um nauðsynlegar framkvæmdir þurfa greinilega að bíða betri tíma.

Sameinumst og sýnum í orði og verki hversu vænt okkur þykir um hverfið okkar

Breiðholtsvikan og Breiðholtsdagurinn. 

Hátíðarvikan hefst 15. september og lýkur með hátíðardagskrá um allt hverfið hinn 20. september.  Í Breiðholtinu finnst margbrotið mannlíf og er Breiðholtsdagurinn hugsaður til að íbúar, fyrirtæki, stofnanir og félagasamtök geti kynnst hvert öðru þegar allir þessir aðilar fylkja liði og fjölmenna á fjölbreytta viðburði sem nú eru í undirbúningi víðs vegar um hverfið.

Dagskrá vikunnar verður æði fjölbreytt og leggja þar margir hönd á plóg.  Listviðburðir, kynningar, skipulagðar göngur og hlaup er einungis brot af því sem í boði verður.
Breiðhyltingar eru stoltir af hverfinu sínu og bera þróun og vöxt þess fyrir brjósti. Þeim er umhugað að hlúa að ímynd hverfisins og vilja í þeim tilgangi stilla saman strengi sín og sýna í orði og verki hverju sameiginlegur hugur getur áorkað. 

Breiðhyltingar, sameinumst öll sem eitt og hyllum hverfið okkar á Breiðholtsdaginn 20. september.

Óvenjumikið rusl á götum og gangstéttum í Seljahverfi

Ábending hefur borist um að talsvert sé af rusli, bréfarusli og flöskum á grasbölum meðfram gangstéttum t.d. í Jafnaseli og í kringum Krónuna. Spurning er hvernig þessu er farið í öðrum hverfum Breiðholts?

Það er óskandi að hreinsun gatna og gangstétta í hverfinu sé á næstu grösum. 

Betrumbætum Breiðholtið

Birtur hefur verið listi yfir stofnframkvæmdir í Breiðholti 2008.

Meðal þess sem stendur til að betrumbæta og endurbæta eru ýmsar lóðir í Breiðholti. Fyrri áfangi framkvæmda við lóð Hólabrekkuskóla er kominn á dagskrá og hönnun lóðar Fellaskóla sem og undirbúningur fyrir endurbætur á lóð við Hólaborg.

Fleiri stærri verkefni er á döfinni í tengslum við skóla og íþróttamannvirki í Breiðholti. Viðbygging ofan á vesturálmu skólans og endurskipulag á núverandi byggingu er þar á meðal. Í Ölduselsskóla verður viðbygging tekin í notkun í febrúar og breytingar á eldri byggingu fara fram í sumar.

Áætlað er að hefja á árinu framkvæmdir á viðbyggingu við leikskólann Seljakot.
Einnig er unnið að framkvæmdum við nýtt félagshús Leiknis. Verklok eru áætluð um næstu áramót.

Gott mál.
Betrumbætum Breiðholtið!