Fjölmennur fundur um löggæslumál í Breiðholti haldinn í Seljakrikju

Um 150 manns komu til fundar í Seljakirkju sem Íbúasamtökin Betra Breiðholt stóðu fyrir til þess að Breiðhyltingum gæfist kostur á að heyra milliliðalaust um þær breytingar sem orðið hafa á skipulagi löggæslumála í Breiðholti.

Frummælendur voru Þorsteinn Hjartarson, framkvæmdarstjóri Þjónustumiðstöðvarinnar í Breiðholti, Ragna Árnadóttir, dómsmálaráðherra og Stefán Eiríksson, lögreglustjóri á höfuðborgarsvæðinu.

Ragna Árnadóttir, dómsmálaráðherra, sagði í ávarpi sínu að á tímum sem þessum á Íslandi gerði fólk kröfu um réttlæti og að lögregla og dómstólar sinntu hlutverki sínu.
 
Skipulagsbreytingar hjá lögreglunni í Breiðholti hafa leitt til þess að fimm lögreglumenn, þar á meðal tveir hverfislögreglumenn, hafa verið fluttir úr Mjóddinni yfir á Dalveg í Kópavogi. Þaðan er löggæslu fyrir Kópavog og Breiðholt sinnt.

Stefán Eiríksson áréttaði að markmið breytinganna væri að efla og bæta löggæsluna í Kópavogi. Hann benti einnig á að hverfislögreglumennirnir hefðu áfram aðstöðu í Þjónustumiðstöðinni í Mjódd þrátt fyrir að þeir fengju nú fleiri verk á sínar hendur.
 
Myndin er tekin í lok fundarins. Á henni eru lögreglumennirnir sem sinnt hafa Breiðholti hvað mest, lögreglustjóri, dómsmálaráðherra og fulltrúar úr stjórn ÍBB ásamt fundarstjóra, Ólafi Jóhanni Borgþórssyni, presti í Seljakirkju.